GRAMMAIRIEN

s. m. Celuy qui sçait, ou qui enseigne la Grammaire. Donat, Priscian ont esté de fameux Grammairiens.

Le tiltre de Grammairien estoit autrefois un tiltre d'honneur, qu'on donnoit non seulement à ceux qui estoient excellents dans la Philologie, mais à tous ceux qui passoient pour sçavants en quelque sorte de science que ce fust, comme tesmoigne Gerard Vossius dans son livre de la Grammaire. Philoponus fameux Philosophe a esté appellé Grammairien, quoy qu'il excellast en plusieurs sortes de sciences, comme on voit dans la Bibliotheque de Photius. Jean Tzetzes dans le XII. Siecle, & Saxon Historien de Danemark dans le XIII. ont esté appellez Grammairiens, & en l'an 1580. Thomas d'Averse Jurisconsulte Neapolitain n'a pas eu d'autre surnom. Mr. Baillet.