NOBLE

adj. masc. & fem. & subst. Gentil-homme, celuy qui est eslevé au dessus des roturiers par sa naissance, par ses charges, ou par la faveur du Prince. Les vrais Nobles sont les Nobles de race, de sang, d'extraction. Les nouveaux Nobles sont ceux qui ont esté annoblis par leurs charges, par leurs emplois, & particulierement par les militaires. Les Nobles par lettres, sont ceux qui ont obtenu lettres du Prince pour jouïr du privilege des Nobles. Les paysans sont toûjours ennemis des Nobles, & sur tout des Nobles de campagne. On fait de temps en temps la recherche des faux Nobles. Les Nobles Venitiens sont les anciens Nobles de Venise qui gouvernent la Republique. On disoit autrefois, le Noble Roy de France. En la coste de Malabar, les enfans ne peuvent estre Nobles que du costé de leur mere, parce qu'il leur est permis de prendre autant de maris qu'il leur plaist & de les quitter, quand bon leur semble.

NOBLE, se dit aussi de ce qui appartient au Gentilhomme. Un fief est Noble par sa nature. On donne aux Gentilshommes la garde noble de leurs enfants. La guerre est un mestier noble, la profession des Nobles. Ce guerrier a la mine fiere, l'air noble. On donne la qualité de noble homme, à des bourgeois, qui ne devroit appartenir qu'aux vrais Nobles.

NOBLE, se dit aussi des choses à qui on veut donner avantage sur les autres. La noble espine est l'espine blanche.

Noble à la rose, est une monnoye d'Angleterre ainsi appellée, à cause de l'excellence de l'or dont elle est faite, & à cause des roses blanches & rouges des Maisons de Lancastre & d'York. Cette monnoye a d'un costé la figure d'un navire, & de l'autre celle d'une rose. Elle a esté battuë du temps d'Edoüard III. en l'an 1344. On tient que ce fut Raimond Lulle qui fournist tout l'or des nobles à la Rose pour aller faire la guerre aux Turcs, au lieu dequoy le Roy Edoüard la fit à la France : d'où vient que quelques Auteurs Latins appellent cette monnoye, nobile Raimondi, lequel sçavoit l'art de la Pierre Philosophale, comme on recueille, tant de ses Oeuvres, que de celles de Majerus, de l'Abbé Cremerus, &c. Il y a eu aussi en France des nobles à la rose, des nobles Henry, qui ont esté de differentes especes de monnoye d'or.

NOBLE, se dit figurément en choses spirituelles & morales. L'ame de l'homme est sa plus noble partie, le rend le plus noble des animaux. Cet homme a un courage noble, un noble genie. Ce Poëte donne à ses personnages des pensées nobles, des sentiments nobles & genereux ; fait des vers nobles & pompeux. On dit aussi, une noble audace, un noble orgueil. Caton d'Utique se fit mourir par un noble desespoir.

Le corps a aussi ses parties nobles, qui sont celles sans lesquelles il ne peut vivre, le coeur, le cerveau, le foye.

On dit proverbialement d'un homme dont on veut exaggerer la qualité, qu'il est noble comme le Roy. On dit aussi en mauvaise part, Cet homme est fou, ou le Roy n'est pas noble.