MEDECIN

subst. masc. Celuy qui a estudié la nature du corps humain, & des maladies qui luy arrivent, qui fait profession de les guerir. Le Medecin methodique ou Galenique est celuy qui guerit avec des remedes doux, ordinaires, experimentez & qui les donne à propos. Medecin Chymique, Spagirique & empyrique, est celuy qui se sert de remedes violents, tirez des mineraux avec le feu. Il y a des Medecins de la faculté de Paris, de Montpellier, &c. En ce sens on dit, il a suivi l'ordonnance du Medecin, il a appellé le Medecin ; il a esté abandonné des Medecins, condamné des Medecins. Chez le Roy il y a le premier Medecin. Les Medecins ordinaires, les Medecins de quartier, les Medecins du commun.

MEDECIN, se dit aussi, mais improprement, de celuy qui communique un remede qu'il a appris ou esprouvé à celuy qui en a besoin. Tout le monde se mesle d'estre Medecin. Quand on est avancé en âge, il faut estre son Medecin, à soy-même, sçavoir ce qui nous est propre.

On appelle aussi le quatriésme doit de la main, le Medecin, à cause que les Anciens se servoient de ce doit-là pour delayer leurs medicaments.

MEDECIN, se dit figurément en choses morales & spirituelles. Le temps est le medecin de toutes les douleurs. Le Vin est le medecin de la melancolie. Le Confesseur est le medecin des ames. Les Predicateurs sont les medecins des moeurs.

MEDECIN, se dit proverbialement en ces phrases. Heureux le Medecin qui vient sur le declin de la maladie, pour dire, qu'il a l'honneur de la cure qui se fait par les forces naturelles. On dit aussi, aprés la mort le Medecin, pour dire, qu'on apporte le remede à une affaire, quand elle est ruinée, quand il n'est plus temps. On appelle aussi un Medecin d'Eau douce, celuy qui est ignorant en Medecine, qui n'ordonne que des remedes trop communs. Quelques-uns croyent que ce proverbe vient d'un nommé & Asclepiade, méchant Medecin dont parle Pline au Livre 26. qui affecta de se rendre celebre en ordonnant seulement de l'eau à ses malades.

MEDECIN, gueris toy toy-même, est un proverbe sacré que JESUS-CHRIST a dit en l'Evangile à ceux qui vouloient guerir les autres, & qui avoient plus besoin d'estre gueris.