DIGNE

adj. m. & f. Qui merite quelque honneur, quelque recompense. Seigneur, je ne suis pas digne que vous entriez dans ma maison, disoit le Centenier à JESUS-CHRIST. St. Jean disoit qu'il n'étoit pas digne de dechausser les souliers de celuy qui viendroit aprés luy. Un Auteur grave est digne de foy. On dit que c'est un homme digne, un digne sujet, pour dire, qu'il est capable de remplir une grande charge, une dignité éminente. Le Roy choisit de dignes sujets pour mettre dans les charges, dans les Prelatures. On dit aussi, Cela est digne de pitié, cela est digne de grace, digne de pardon. C'est un crime digne de mort, qui merite la mort. On dit aussi d'un brave homme, qu'il a fait une action digne de luy, digne de sa naissance. Et au contraire on dit d'un infame, qu'il n'est pas digne de vivre.