PASTENAQUE

s. f. est un poisson de mer qu'on appelle autrement tareronde, qui est de la figure d'une raye. Il est bon à manger, horsmis la teste & la queuë, qui sont fort venimeuses. Pline dit qu'il n'y a rien de si dangereux que l'aiguillon de sa queuë, lequel est de cinq pouces de long ; & qu'il fait mourir les arbres qui en sont picquez par la racine, quoy qu'il dise aussi qu'il appaise la douleur des dents, & les fait tomber en scarifiant la gencive. Sa picqueure cause aux hommes une douleur continuelle, & un endormissement de tout le corps, qui fait quelquefois mourir avec convulsion. Oppian escrit que ce poisson garde son venin encore qu'il soit mort, & que son foye posé sur la playe en est le contrepoison. Il y a des pastenaques qui ont jusqu'à cinq pieds de long. Elles sont semées de petites boucles ou pointes semblables à des estoiles fort aiguës, & ses aiguillons sont en forme de scie garnis de dents des deux costez, qui luy servent à prendre les poissons dont elle vit. On l'appelle en Latin pastinaca, scorpio marinus. Quelques-uns l'appellent aussi glorin, & bastango, & scorpeno.